الأحداث - كلمة عضو تكتل الجمهورية القوية النائب بيار بو عاصي خلال الجلسة في ساحة النجمة:

 لا بدّ اني بلّش اليوم بموضوع الكهرباء بعد يلّي سمعتو. وزراء الطاقة السابقين بالتيار الوطني الحر عم يطالبو وزير الطاقة بخطة. مصيبة البلد وهالقطاع بالذات انهن ب ١٢ سنة قدمو ٥ خطط بس ما جابو كهرباء ولا حاولو فعلياً يجيبو كهرباء. الناس ما بدها خطط، بدها كهرباء. شو عمل التيار الوطني الحر ليكون في حل مستدام للطاقة؟ ولا شي. قدمو خطط. شو عملو لإصلاح الشبكة وتامين الجبايات والتحويل إلى الغاز؟ ولا شي. قدمو خطط. شو عملو لزيادة الانتاج او إصلاح الشبكة او التحويل عالغاز؟ بس خطط. باستثناء محاولة لاستقدام باخرة إضافية، عبر دفتر شروط واستدراج عروض مفصل على قياس شركة كارادينيز، ما عملو شي. ولا شي. اعتراض د. جان العلية ودعمنا لإدارة المناقصات منع هيدي الصفقة المشبوهة الي بتفح منها روائح الفساد. 

بدن السلطة بس ما بدن يتحملو المسؤولية. بدن وما خلّوهن. ولو لمرّة واحدة يكون عندكن جرأة تقولو مين ما خلاكن وكيف ما خلاكن. إذا ما حصلتو على اعتمادات طالبتو فيها، ليه تصوتو مع نفس الموازنات يلي الاعتمادات المذكورة غابت عنها.

بفشلكم بتأمين حل مستدام للكهرباء عطلتو أمور الناس وزدتو الكلفة عليهن أضعاف وحمّلتو خزينة الدولة ٢٦ مليار دولار وضربتو الاقتصاد. مش مهم شو كان بدكن تعملو، المهم انو عملتو العمايل بالبلد وبالناس. 

اما في موضوع الموازنة فهي موازنة لا استثمارية ولا اجتماعية. الاستثمارات ما رح تجي على البلاد إذا ما في وحدة قرار سيادي ووحدة سلاح واستقرار. بدون هيدي العناصر وهيي الاساس ما نتأمل لا بازدهار ولا بنمو. ما حدا رح يستثمر بدولة ممكن بأي لحظة فريق من خارج الاطر الشرعية والدستورية يزجها فجأة بحرب مدمّرة. 

اجتماعياً وماليا بدي حذر من امرين. ما عم ينرصد للشأن الاجتماعي الموازنة اللازمة بظروف بالغة الصعوبة على ناسنا وخاصة الفئات المهمشة والضعيفة بمجتمعنا. بالمقابل رجعنا نستسهل الاستدانة وزادت قروضنا بسنة على مليار ومئتين مليون دولار. الديون بدون ايجاد حلول مستدامة بتجر ديون اخرى متل ما صار بقصة الكهرباء. ارتفاع معدلات الدين العام اللامسؤولة هو احد اسباب انهيارنا الاقتصادي. 

ختاماً، في موضوع الانتخابات من غير المقبول عند كل استحقاق انتخابي يكون رد الفعل الأولي الذهاب نحو التأجيل. هالمنطق عم يوضع حرياتنا العامة وديمقراطيتنا بدائرة الخطر. نحنا كنواب مؤتمنين على الديمقراطية لنحترمها ونعززها مش لأنجلها. الانتخابات ملك الناس مش ملكنا.

[29/01, 15:28] Bou Assi Pierre: التيار لم يقم بخطوة واحدة لتأمين حل مستدام للطاقة فكان من اول المتسببين بالانهيار الاقتصادي. وعم يعطي دروس.