الأحداث - وضع الموفد توماس برّاك على طاولة الرؤساء الثلاثة بلبنان، ويلي طلب فيها حصر السلاح بيد الدولة، تحسين العلاقات مع سوريا، وتنفيذ الإصلاحات. والمشاورات مستمرة بين الرؤساء للتوصل لقرار نهائي لأنو حزب الله ما بدو يسلم سلاحو!الموقف اللبناني الرسمي بعدو عم يلوطع ومستحيين ياخدوا قرار. الرئيس نواف سلام زار الرئيس بري بعين التينة، واستكمل النقاش بورقة براك. والمعلومات بتقول إنو بعد عاشوراء ممكن نشهد جلسة خاصة لمجلس الوزراء لدرس الرد، بس لليوم، ما في شي محسوم.التصعيد على الأرض مستمر، من استهدافات إسرائيلية يومية بيقابلها حزب الله بالتعرض لليونيفيل بشكل شبه يومي. وبالتالي، عم يزيد الضغط الأميركي – الإسرائيلي بهدف تسريع الحل، والبحث بآلية واضحة وجدول زمني لتسليم السلاح، تحديداً شمال الليطاني.رئيس الجمهورية جوزاف عون شدّد خلال لقاؤه قائد اليونيفيل الجديد على أهمية تطبيق القرار 1701 بشكل كامل، وعلى انسحاب إسرائيل من التلال الخمس المحتلة. بالمقابل، حزب الله عم يشترط وقف العدوان، وتحرير الأسرى، قبل أي بحث جدّي بالسلاح، بمحاولة واضحة للمماطلة وشراء الوقت وناسي انو منو بوضع قادر يفرض شروط.اليوم، لبنان واقف على مفترق طرق: يا بياخد القرارات يللي بتحفظ سيادته وبيحصر السلاح بإيد الشرعية وتمنع الانفجار، يا رح تفلت الأمور.