الاحداث- كتبت جوزفين حبشي

‎ هلأ تنيناتن، النساء والرجال "قبضايات"بالسواقة، وتنيناتن بيمشكلوها على القطعة . 
‎بس الفرق انو مع الرجال بيدور الخبيط، ومع النسوان بيدور الضحك. 
مشهد هزلي قبل شوي عنا بالحي:

‎تنين ستات،كل وحدة راكبة جيب، وسكروا الطريق.
‎اول مرا : ارجعي، ما بتقطع سيارتي
‎التانية: انت ارجعي وامبلا بتقطع.
‎اول مرا: ما بتفهمي يا حمارة؟ ما بتقطع.
‎التانية: امبلا بتقطع يا حمارة السواقة.
‎اول مرا: انت الحمارة واللي عطاكي دفتر سواقة احمر منك.
‎التانية: انت الحمارة، وجوزك احمر منك لأنو جبلك هيك سيارة...

‎وبالنهاية، بتقطع ما بتقطع؟ ما كانت تتقطّع معن للستات، بس ولا وحدة منهن نزلت عن عرشا الرباعي الدفع، وولا وحدة تنازلت، وضل السير مسكر  بالحيّ شي نص ساعة ، والتشهنق داير، قصدي التزمير، لحد ما تنيناتن قطعوا، لأنو الطريق اصلا واسعة.

‎اهضم شي انو رجال الحي، ركّبوا راس حمار، وما تدخلوا بيناتن.

‎اما انا، فشكرت ربّي اني  ما بسوق من اصلو.  ويسترجي حدا يقلي حمارة.

======